Պորտուգալիայի հավաքականի և Մադրիդի «Ռեալի» հարձակվող Կրիշտիանու Ռոնալդուն համաձայնվել է տեղափոխվել Թուրինի «Յուվենտուս»: 33-ամյա հարձակվողն ընդունել է իտալացիների առաջարկը տարեկան 30 մլն եվրո աշխատավարձով: Այժմ նրանք պետք է իսպանացիների հետ համաձայնեցնեն գործարքի գումարը: «Յուվենտուսը» որպես հրաժարագին առաջարկել է 100 մլն եվրո, սակայն «Ռեալի» ղեկավարությունը մտադիր է ավելին ստանալ, գրում է Lenta.ru-ն AS-ի վրա հղումով:
Հուլիսի 4-ին Marca-ն գրել է, որ պորտուգալացին բնակարան է որոնում Թուրինում և կարող է դիտարկել տեղական ակումբի առաջարկը:
Հունիսի 2-ին Corriere dello Sport-ը հայտնել է, որ Ռոնալդուն մտադիր է մնալ իսպանական ակումբում, եթե տարեկան 80 մլն եվրո ստանա: Բարդ բանակցությունների պատճառով ակումբի ղեկավարության հետ տարաձայնություններ առաջացան: Պարտուգալացին ակնարկել էր, որ կարող է փոխել ակումբը ՉԼ-ում «Ռեալի» հաղթանակից հետո:
2009-ին պորտուգալացին տեղափոխվել է մադրիդյան ակումբ անգլիական «Մանչեսթեր Յունայթեդից»: Ֆուտբոլիստը 2 անգամ Իսպանիայի չեմպիոն է դարձել և 5 անգամ հաղթել է Չեմպիոնների լիգայում:
