6 հուլիսի 2018 - 18:51 AMT
Փաշինյան. 10 մլրդ դրամ կհատկացվի համայնքներին

Աշխատանքային այցով Վայոց ձորի մարզում գտնվող ՀՀ վարչապետ Նիկոլ Փաշինյանը հայտարարել է, որ Տարածքային կառավարման և զարգացման նախարար Սուրեն Պապիկյանի առաջարկով որոշվել է 10 մլրդ դրամ հատկացնել համայնքներին: Այս մասին հայտնում է ՀՀ կառավարության տեղեկատվության և հասարակայնության հետ կապերի վարչությունը:

Փաշինյանը կոչ է արել ներկայացնել համայնքային զարգացման ծրագրեր, որոնք նախընտրելի է՝ վերաբերվեն ենթակառուցվածքների, խմելու, ոռոգման ջրի համակարգերի վերականգնմանը, գյուղտեխնիկային և ճանապարհներին:

«Հույս ունենք գումարները ծախսել այնպես, որ դրանք բերեն շղթայական ռեակցիա, որպեսզի տնտեսությունը մարզերում տեղից շարժվի»,- ասել է վարչապետը՝ ընդգծելով, որ պետք է հատուկ ուշադրություն դարձնել շինարարության որակին:

Նիկոլ Փաշինյանը հանդիպումներ է ունեցել համայնքների ղեկավարների, Եղեգնաձորի ու Արենիի բնակիչների հետ:

Ավելի վաղ, վարչապետ Փաշինյանն աշխատանքային այցով Սյունիքի մարզում էր: Նա Ջերմուկում հուլիսի 6-ին հանդիպել և քննարկումներ է ունեցել Ամուլսարի հանքի շահագործման դեմ պայքարող քաղաքացիական նախաձեռնության անդամների, հարակից համայնքների բնակիչների և հանքը շահագործող «Լիադիան Արմենիա» ընկերության ներկայացուցիչների հետ: