ՀՀ կենտրոնական բանկը և առևտրային բանկերը կաշխատեն սեպտեմբերի 21-ին և 22-ին: Այդ մասին ասվում է Կենտրոնական բանկի հայտարարության մեջ:
Դա պայմանավորված է սեպտեմբերի 23-ին Երևանի ավագանու արտահերթ ընտրություններին մասնակցող կուսակցությունների (կուսակցությունների դաշինքների) նախընտրական հիմնադրամների հաշիվների հետ կատարվող բոլոր գործառնությունների անխափան իրականացման և հաշիվների սպասարկման անհրաժեշտությամբ:
ՀՀ կենտրոնական բանկը հայտնում է, որ սեպտեմբերի 21-ին և 22-ին (ժամը 9:00-ից 17:00-ն) ՀՀ կենտրոնական բանկում աշխատելու են համապատասխան ստորաբաժանումները:
Վերջիններս կապահովեն քաղաքացիների և կուսակցությունների կողմից նշված օրերին ընտրություններին մասնակցող կուսակցությունների (կուսակցությունների դաշինքների) նախընտրական հիմնադրամներին կանխիկ և անկանխիկ վճարումների սպասարկումը:
Սեպտեմբերի 21-ին և 22-ին աշխատող առևտրային բանկերի մասնաճյուղերի մասին կտեղեկացվի լրացուցիչ: