Ադրբեջանը Սեւ Ծովից Հարավային Կորեա ձգվող երկաթուղային տրանսպորտային միջանցքին միանալու իրական շանս ունի: Այդ մասին Բաքվում կայացած մամլո ասուլիսի ժամանակ հայտարարել է Ադրբեջանում Ուկրաինայի դեսպան Բորիս Կլիմչուկը: Նրա խոսքերով, Լիտվան, Ուկրաինան եւ Բելառուսը մայիսի 12-ին երեքկողմանի համաձայնագիր են կնքել Սեւ Ծով- Մերձբալթյան շրջան ուղղությամբ բեռնափոխադրումների վերաբերյալ: Համաձայնության հիմնական նպատակը Սեւ եւ Բալթիկ ծովերի շրջանների միջեւ բեռնաշրջանառության ծավալի մեծացումն է: «Այդ համաձայնությունը թույլ կտա կրճատել բեռի փոխադրման համար ծախսվող ժամանակը եւ խուսափել խտրականությունից իրենց տարածքներում փոխադրումների հարցում: Կողմերը նաեւ պայմանավորվել են ընդարձակել Լիտվա-Բելառուս-Ուկրաինա տրանզիտային երթուղու աշխարհագրությունը եւ հեռանկարում ընդգրկել Թուրքիան, Ադրբեջանը եւ Վրաստանը»,- նշել է Կլիմչուկը: Դեսպանը նշել է, որ ապագայում այդ երթուղին կարող է միանալ Մետաքսի ճանապարհին եւ հասնել Հարավային Կորեա: «Ադրբեջանական կողմը հետաքրքրվել է այդ նախագծով»,- ասել է դեսպանը, հաղորդում է ադրբեջանական Trend գործակալությունը: