Երևանի պատմության և մշակույթի անշարժ հուշարձան հանդիսացող Հանրապետության հրապարակի 4 հասցեում գտնվող հուշարձանի Պատմության թանգարանի հատվածի ներքին տարածքում փոփոխություններ կիրականացվեն: Համապատասխան որոշման նախագիծն ընդգրկված է կառավարության նոյեմբերի 8-ի նիստի օրակարգում:
Իրականացվելու է մասնակի վերահատակագծում, միջհարկային ծածկերի և աստիճանների կառուցում:
Որոշման նախագծի ընդունման դեպքում, նախատեսվող վերելակն և աստիճանը կապահովեն թանգարանի տարածքների արդյունավետ օգտագործումը, հենաշարժական խնդիրներ ունեցող անձանց մուտքն ու ելքը, ինչպես նաև շինության ներսում այցելուների ազատ տեղաշարժն ապահովող համապատասխան հարմարություններ կստեղծվեն:
Նշվում է, որ նախագիծը, պահպանելով հանրապետական նշանակության հուշարձանի արժեքը, կնպաստի դրա արդյունավետ օգտագործմանը, ինչպես նաև պատմության թանգարանի շահագործման նորմատիվային պահանջներին համապատասխանեցմանը: