Երկօրյա աշխատանքային այցով Ռուսաստանի Դաշնությունում գտնվող ՀՀ պաշտպանության նախարար Սեյրան Օհանյանի գլխավորած պատվիրակությունը հանդիպեց Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժայի եւ ՀԱՊԿ միացյալ շտաբի ղեկավարության հետ: Ինչպես PanARMENIAN.Net-ին հայտնել է ՀՀ պաշտպանության նախարարի մամլո քարտուղար, գնդապետ Սեյրան Շահսուվարյանը, հանդիպման ընթացքում կողմերը քննարկեցին հավաքական անվտանգության համակարգի զարգացմանը, ՀԱՊԿ շրջանակներում խաղաղապահ գործունեությանը, ռազմական, ռազմատեխնիկական, ռազմաուսումնական եւ ռազմատնտեսական համագործակցությանը նպաստող հարցեր: Քննարկվեցին նաեւ ՀԱՊԿ անդամ պետությունների պաշտպանության նախարարների կայանալիք հերթական նիստի օրակարգային հարցեր. ի դեպ, այս անգամ խորհրդի նախագահությունը ստանձնելու է Հայաստանը:

Հանդիպմանը կարեւորվեց հատկապես «Ռուբեժ 2008» հրամանատարաշտաբային զորավարժության անցկացումը, ինչպես նաեւ քննարկվեցին կազմակերպչական որոշ հարցեր: Կողմերն անդրադարձան նաեւ Միացյալ ռազմական համակարգերի ստեղծմանն ու գործունեությանն առնչվող խնդիրների: