ՀՀ քաղաքացիները չպիտի վախենան որևէ քաղաքական ուժերից, ուժերն են, որ պիտի վախենան քաղաքացիներից, քանի որ նրանք են որոշելու՝ ով լինի խորհրդարանում, ով՝ ոչ։
Այս մասին հայտարարել է վարչապետի պաշտոնակատար Նիկոլ Փաշինյանը Սպիտակում քարոզարշավի ժամանակ։
Լսելով՝ «ոչ Հանրապետականը» ռեպլիկը, Փաշինյանը շեշտել է, որ ինքը չի խորհրդարան անցնող-չանցնողներին որոշողը։ «Եվ ձեր կոչն է՝ ոչ մի ձայն Հանրապետական կուսակցությանը․․․ որովհետև չի կարելի ներել, փորձը ցույց է տալի՝ ինչքան փորձում ենք մենք, այսպես ասած, լարումներ չմտցնել, ինչքան փորձում ենք սիրո և համերաշխության մթնոլորտը տարածել, ոմանք առիթավորվում են դրանից։ Այս ընտրություններին կա պատմական շատ կոնկրետ առաքելություն՝ ՀՀԿ-ականների թալանչի բրիգադը պետք է ուղարկվի պատմության աղբանոցը։ Ոչ մի ձայն Հանրապետականին», - հայտարարել է նա։
«Ես ասում եմ՝ եթե ազատ ու արժանապատիվ քաղաքացի ես, ձայն չտաս Հանրապետականին։ Ես ասում եմ՝ ձայն չտաս որևէ ուժին, որոնք թեկուզ մի անգամ փորձել են ընտրակաշառքով ընտրություն հաղթել․․․ սպառնալիք է կիրառել սեփական ժողովրդի նկատմամբ, ոչ մի ձայն այն ուժերին, որոնք մտածում են, որ Հայաստանում կարելի է բռնությամբ և զենքով հարցեր լուծել»,- շեշտել է Փաշինյանը։