Ադրբեջանի ԱԳ նախարար Էլմար Մամեդյարովն առաջարկել է ԵԱՀԿ գլխավոր քարտուղար Թոմաս Գրեմինգերին հերթական գնահատման առաքելությունն ուղարկել Լեռնային Ղարաբաղ:
Մամեդյարովը հանդիպել է Գրեմինգերի հետ Միլանում ԵԱՀԿ ԱԳՆԽ նիստի շրջանակներում, հայտնում է Ինտերֆաքս Ադրբեջանը այդ երկրի ԱԳՆ վրա հղումով:
Արտաքին քաղաքականության գերատեսչությունը նշում է, որ զրուցակիցները քննարկել են ղարաբաղյան հակամարտության կարգավորման հեռանկարները: «Պատասխանելով Գրեմինգերի այն հարցին, թե ինչ դեր կարող է ունենալ ԵԱՀԿ-ն ղարաբաղյան հակամարտության կարգավորման գործում՝ Մամեդյարովը կարևորել է ԵԱՀԿ դերը Լեռնային Ղարաբաղ հնարավոր գնահատման առաքելություն գործուղելու հարցում»,-ասվում է Ադրբեջանի ԱԳՆ հայտարարության մեջ:
Մամեդյարովը տեղեկացրել է Գրեմինգերին ՀՀ ԱԳ նախարարի պաշտոնակատար Զոհրաբ Մնացականյանի և ԵԱՀԿ ՄԽ համանախագահների հետ հանդիպման մասին՝ նշելով, որ «հանդիպումներն օգտակար են եղել, պայմանավորվածություն է ձեռք բերվել մոտ ապագայում շարունակել ինտենսիվ, արդյունավետ բանակցություններն առկա ձևաչափով»,-ասվում է հաղորդագրության մեջ:
Ավելի վաղ Էլմար Մամեդյարովը հայտարարել էր, որ 2019-ին պետք է բեկում կատարվի ԼՂ կարգավորման հարցում: «2019-ին մենք պետք է բեկում կատարենք կարգավորման մեջ՝ ավելացնելու համար տարածաշրջանում խաղաղության հաստատման ու բարգավաճման հնարավորությունները,-ասել է նա Միլանում՝ ԵԱՀԿ ԱԳ նախարարների խորհրդի ամենամյա նիստում: