Պետական եկամուտների կոմիտեի նախագահ Դավիթ Անանյանը, կառավարության նիստից հետո լրագրողների հետ զրույցում անդրադառնալով բեռնափոխադրողների բողոքի ակցիայի մասնակիցների պահանջին, հայտարարել է, թե դա ընդհանրապես ՊԵԿ գործառույթը չէ։
Բեռնափոխադրող ընկերություններն դեկտեմբերի 27-ին բողոքի ակցիա էին իրականացնում կառավարության դիմաց. նրանք բողոքում էին հարկային բեռի ավելացումից։ Ակցիայի մասնակիցները պահանջում էին խնդրին լուծում տալ, այլապես խոստանում էին բեռնատարներով փակել փողոցները և կաթվածահար անել երթևեկությունը։
«Ես մեկնաբանելու որևէ բան չունեմ, ՊԵԿ-ը վարչարարությամբ զբաղվող մարմին է, քաղաքականությամբ չի զբաղվում», - ասել է ՊԵԿ նախագահը՝ նշելով, որ եթե օրենսդրության հետ կապված խնդիր կա և օրենսդրությունը պետք է փոխվի, ապա դրանով այլ մարմին պետք է զբաղվի, հայտնում է Aysor.am-ը։
Դավիթ Անանյանն ասել է, որ ֆինանսների նախարարի պաշտոնակատարի և տրանսպորտի նախարարի պաշտոնակատարի հետ պայմանավորվել են հունվարի հենց առաջին աշխատանքային օրերին քննարկման առարկա դարձնել հարկ վճարողների ահազանգը կամ մտահոգությունը։
«Թե ինչքանով է վիճահարույց այս կամ այն ակտը, քննարկման առարկա կդարձնենք, որոշում կկայացնենք և առաջիկա հարկային օրենսգրքի փոփոխության փաթեթում հավանականությունը կքննարկենք, թե ինչ կարելի է անել։ Բայց դա ընդհանրապես ՊԵԿ գործառույթը չէ», - ասել է Դավիթ Անանյանը։
Ավելի վաղ հայտնի դարձավ, որ տրանսպորտի և կապի նախարարի պաշտոնակատար Հակոբ Արշակյանը նրանց հորդորել է հունվարին նստել մի սեղանի շուրջ ու քննարկել իրավիճակը, փորձել լուծումներ գտնել: Իսկ փաստաթղթաշրջանառությունը չապահովելու համար ՊԵԿ-ը ստուգումներ է անում, տուգանքներ նշանակում ընկերություններին։