Չնայած գործադրված բոլոր ջանքերին, Թուրքիան չկարողացավ կանխել Լեռնային Ղարաբաղի «օկուպացիան»: Այդ մասին հայտարարել է Թուրքիայի նախագահ Ռեջեփ Թայիփ Էրդողանը, հայտնում է Trend-ը թուրքական ԶԼՄ-ների վրա հղումով:
Էրդողանը հավելել է, թե այն ժամանակ Թուրքիան հզոր պետություն չէր:
Ըստ նրա, Թուրքիան դասեր է քաղել իր սահմանների մոտ տեղի ունեցած իրադարձություններից և հասկացել է, որ պետք է շատ հզոր լինի:
2018-ի սեպտեմբերին Թուրքիայի նախագահ Ռեջեփ Թայիփ Էրդողանը Բաքվում հայտարարեց, որ առանց ղարաբաղյան հակամարտության կարգավորման ՀՀ հետ հարաբերությունների բարելավում հնարավոր չէ: Նա նաև ասել է, որ Հայաստանը չի կարող ակնկալել Թուրքիայի հետ սահմանի բացում, քանի դեռ լուծված չէ Ղարաբաղի հարցը:
Թուրքիան մշտապես սատարել է Ադրբեջանին Լեռնային Ղարաբաղի հիմնախնդրի հարցում: 2016-ի ապրիլին ևս այդ երկիրը պաշտոնապես հավանություն տվեց Ադրբեջանի գործողություններին:
