ԱԺ մարտի 26-ի նիստում՝ կենսաթոշակի նվազագույն շեմ սահմանելու մասին օրենքի նախագծի ներկայացման ժամանակ ՀՀ աշխատանքի և սոցիալական հարցերի փոխնախարար Սմբատ Սաիյանը հայտարարել է, որ ներկայում երկրում ծայրահեղ աղքատ մարդկանց թիվը 60-70,000 է:
Այսինքն, ծայրահեղ աղքատ է ՀՀ մշտական բնակչության 2.3%-ը:
Փոխնախարարը նշել է, որ այդ անձանցից բոլորը չէ, որ կենսաթոշակառու են:
«Նրանց մի չնչին մասն է, որ թոշակ է ստանում: Միաժամանակ՝ կենսաթոշակառուների շրջանում աղքատության ռիսկը շատ ավելի բարձր է` հաշվի առնելով աշխատանքային եկամուտներ գեներացնելու հնարավորության սահմանափակումը», - ասել է փոխնախարարը:
ՀՀ-ում կենսաթոշակային համակարգում ներմուծվում է նոր ինստիտուտ՝ նվազագույն կենսաթոշակի չափ, որն այս պահի դրությամբ 25,500 դրամ է կազմում:
Փոփոխությունը վերաբերելու է մոտ 18,000 կենսաթոշակառուի։ Պետական բյուջեում այս որոշումը կհանգեցնի մոտ 800 մլն դրամի ծախսերի ավելացման։