Վաշինգտոնի կողմից Գոլանի բարձունքներն Իսրայելի տարածք ճանաչելուց հետո Սիրիան խնդրել է շտապ ՄԱԿ Անվտանգության խորհրդի նիստ հրավիրել այդ հարցով: Այդ մասին հայտնել է AFP գործակալությունը Նյու Յորքում դիվանագիտական աղբյուրների վրա հղումով:
Նիստի ամսաթիվը պետք է նշանակի ԱԽ-ում նախագահող Ֆրանսիան, հայտնում է Deutsche welle-ն:
Թրամփի հայտարարությունից հետո ՄԱԿ-ը հայտարարել էր, որ, իր տեսակետից, Գոլանի բարձունքների իրավական կարգավիճակի շուրջ իրավիճակում ոչինչ չի փոխվում: ԱԽ անդամ եվրոպական երկրները հայտարարել են, որ նախկինի պես այդ տարածքը Սիրիայի տարածք են համարում:
Լիբանանի «Հեղբոլլահ» ծայրահեղական շարժման առաջնորդ Հասան Նասրալլան մարտի 26-ին կոչ է արել դիմադրել Վաշինգտոնի որոշմանը: Ըստ նրա, ԱՄՆ-ն այդ քայլով «իր քամահրանքն է հայտնել արաբական և մահմեդական աշխարհին» և էապես վնասել խաղաղ գործընթացին տարածաշրջանում: