Հարկային օրենսգրքում փոփոխությունների նախագծից հանվել է գազավորված ըմպելիքներն ակցիզով հարկելու դրույթը, հայտնել է ՀՀ ֆինանսների նախարարությունը:
«Օրենսդրական նախաձեռնության վերաբերյալ այդ ապրանքատեսակների արտադրությամբ զբաղվող տնտեսավարող սուբյեկտները ներկայացրել են որոշ մտահոգություններ և անհամաձայնություններ, որոնք մանրամասն և բազմակողմանիորեն քննարկվել են կառավարությունում: Ուստի տեղեկացնում ենք, որ քննարկումների արդյունքում որոշվել է ներկա փուլում ձեռնպահ մնալ գազավորված ըմպելիքներն ակցիզային հարկով հարկելու առաջարկության հետագա քննարկումից և այն հանել հարկային օրենսգրքում փոփոխություններ նախատեսող օրենքի նախագծից», - նշված է նախարարության հաղորդագրության մեջ:
Ավելի վաղ գազավորված ըմպելիք արտադրող ընկերությունների ներկայացուցիչներն ահազանգել էին, որ հարկի կիրառումից հետո կթանկանան բոլոր գազավորված ըմպելիքները, ինչն էլ իր հերթին կհանգեցնի այս ընկերությունների տնտեսական կայունության խաթարմանը:
Նրանք օրեր շարունակ բողոքի ակցիա էին իրականացնում կառավարության շենքի մոտ:
