Forbes-ը հրապարակել է Ռուսաստանի ամենահարուստ գործարարների ամենամյա վարկանիշը, որտեղ 8հայազգի գործարար է ընդգրկված:

Ցուցակի 29-րդ հորիզոնականում է «Տաշիր» ընկերությունների խմբի հիմնադիր և նախագահ, 53-ամյա Սամվել Կարապետյանը: Նրա կարողությունը գնահատվում է $3.7 մլրդ:

Խոշորագույն «Մագնիտ» մանրածախ առևտրի ցանցի հիմնադիր և համասեփականատեր Սերգեյ Գալիցկին (Հարությունյան) 32-րդ հորիզոնականում է $3.5 միլիարդով:

44-րդը հայազգի միլիադատեր Անդրեյ Անդրեևն է (Օհանջանյանց), որը Badoo առցանց ծանոթությունների հիմնադիրն է, $2,3 մլրդ ունի:

«Վարդանյան, Բրոյթման և գործընկերներ» ընկերության նախագահ և RVVZ Foundation ընտանեկան հիմնադրամի համահիմնադիր, «Ավրորա» Մարդասիրական մրցանակի հովանավոր և համահիմնադիր Ռուբեն Վարդանյանը ցուցակում 103-ն է, նրա կարողությունը գնահատվում է $950 մլն:

Եղբայրներ Նիկոլայ և Սերգեյ Սարկիսովները, որոնք «ՌԵՍՕ-Գարանտիա» ընկերության հիմնադիրներն ու տնօրենների խորհրդի նախագահներն են, ցուցակում 134 և 136 տեղերում են համապատասխանաբար: Եղբայրներից յուրաքանչյուրի կարողությունը գնահատվում է $800 մլն:

Վարկանիշի 146-րդ տեղում է «ՍԿԱՐՏԵԼ» ընկերության հիմնադիր և սեփականատեր, ինչպես նաև Yota բաժնետոմսերի սեփականատեր Ալբերտ Ավդոլյանը ($700 մլն):

Վարկանիշը եզրափակում է ևս մեկ հայազգի գործարար՝ ABBYY-ի հիմնադիր, «Այբ» հիմնադրամի համահիմնադիր Դավիթ Յանը: Նրա կարողությունը, գնահատվել է 500 մլն դոլար:

Վարկանիշում 100 դոլարային միլիոնատեր և 100 մուլտիմիլիոնատեր կա: 200 ամենահարուստ ռուսաստանցիների կարողության հանրագումարը գնահատվում է $496 մլրդ: