Հուշարձանագետ Սամվել Կարապետյանը պարզել է, որ շրջանառության մեջ դրված նոր թղթադրամներից 5000 դրամանոցի վրա իսլամական պաշտամունքային կառույց է պատկերված։ Այս մասին նա գրառում է արել ֆեյսբուքյան իր էջում։

«Առաջին անգամ ձեռքս ընկավ 5000-անոցը: Նայում եմ դիմային երեսին` Վիլյամ Սարոյանի դիմապատկերն է. շատ բարի, շրջում եմ թղթադրամի մյուս երեսը, ուր Բաղեշ քաղաքի ուրվանկարն է: Այստեղ միայն մեկ կառույց, որ ձախ անկյունում առաջին պլանով է ներկայացված` քաղաքի մահմեդական պաշտամունքային բազմաթիվ կառույցներից մեկն է` 1533 թվականին կառուցված Շերեֆ խան Դ-ի դամբարանը Շերեֆիյե հուշարձանախմբում», - գրել է Կարապետյանը։

Նա գրել է, որ ձևավորողը ցանկացել է քաղաքի հայկականությունը ընդգծող մի խորհրդանշական պատկեր զետեղել, որն «իհարկե, ներկա մտայնությամբ պետք է լիներ վանք կամ եկեղեցի ու կանգ է առել այս գուցե ոչ հմուտ աչքի համար եկեղեցանման գմբեթավոր շինության վրա, թերևս կարծելով, որ եթե գմբեթավոր է, ուրեմն հայկական եկեղեցի է…»:

Հայկական նոր թղթադրամների էսքիզները հանրությանն են ներկայացվել 2017 թվականի նոյեմբերին։ Դրանք, նախատեսվածի պես, շրջանառույան մեջ են մտել 2018 թվականի վերջին։