ՀՀ պետական եկամուտների կոմիտեն հայտարարել է, որ Արարատյան մաքսատան աշխատակիցներին կոռուպցիոն սխեմաների մեջ ներքաշված լինելու մեջ մեղադրող քաղաքացու ապրանքագրում մեքենայի գինն էականորեն տարբերվել է աճուրդում վաճառքի գնից։
Նշվում է, որ վերջին շրջանում նկատվել է հնարավոր մանիպուլյացիայի նոր մեխանիզմ. քաղաքացիները, թաքցնելով աճուրդից ձեռքբերման փաստաթղթերը, մաքսային մարմիններին ներկայացնում են միջնորդ կազմակերպության կողմից տրված հաշիվ-ապրանքագիր, որում արտացոլված ապրանքի գինն էականորեն տարբերվում է տվյալ ավտոմեքենայի աճուրդում վաճառքի գնից։
«Այսօր քաղաքացի Արա Խաչատրյանի ներկայացրած դեպքը նմանատիպ կասկածելի գործարքների շարքից է: ՊԵԿ-ը, հատուկ ծրագրի միջոցով, նույնականացրել է նրա մատնանշած ավտոմեքենան, որը միջնորդ կազմակերպության կողմից տրված հաշիվ-ապրանքագիրը դուրս գրելուց օրեր առաջ ամերիկյան աճուրդում վաճառվել է $45,000-ով: Ինչ վերաբերում է Ա. Խաչատրյանի բարձրաձայնած կոռուպցիոն սխեմաներին, հարկ է նշել, որ ավագ մաքսային տեսուչ Նարեկ Գևորգյանն աչքի է ընկնում բարձր պրոֆեսիոնալիզմով և ակտիվ մասնակցություն ունի նշված մեխանիզմի բացահայտման գործում», - ասվում է ՊԵԿ-ի տարածած հաղորդագրությունում։
ՊԵԿ-ը վստահեցնում է, որ կոռուպցիոն որևէ դրսևորում տեղ չի կարող ունենալ մեր երկրում և հորդորում է քաղաքացիներին ու տնտեսվարողներին՝ ցանկացած կոռուպցիոն դրսևորում նկատելու պարագայում դիմել համապատասխան մարմիններին:
Ավելի վաղ քաղաքացիներից մեկը լրագրողների հետ զրույցում պնդել էր, թե Արարատյան մաքսատանը կոռուպցիոն սխեմաներ են գործել։