ՀՀ ԱԺ «Լուսավոր Հայաստան» խմբակցության պատգամավոր Գևորգ Գորգիսյանը ենթադրել է, որ ՀՀ երկրորդ նախագահ Ռոբերտ Քոչարյանի կողմից ստորագրված՝ դատախազների առաջխաղացման ցուցակում ընդգրկված Միշա Գրիգորյանը Սահմանադրական դատարանի դատավորի թեկնածու, փաստաբան Վահե Գրիգորյանի հայրն է:
Պատգամավորը մասնավորապես հարցրել է, թե ինչ դերակատարություն է ունեցել Միշա Գրիգորյանը նրա առաջխաղացման մեջ:
Հարցին ի պատասխան Գրիգորյանը նշել է, որ այդ ցուցակում ընդգրկված Միշա Գրիգորյանն իր հայրը չէ։
«Իմ հայրը բանվոր մարդ է եղել, մայրս՝ հաշվապահ, իմ մասնագիտական հաջողությունները ես ձեռք եմ բերել իմ վաստակով և, ընդհանուր առմամբ, ես դրանց համար պարտական եմ հորս և մորս, իսկ այդ Միշա Գրիգորյանն ինձ հետ կապ չունի»,- ասել է ՍԴ դատավորի թեկնածուն։
Վահե Գրիգորյանը նաև նշել է, որ տեղյակ չէ՝ պատգամավորն դատախազների առաջխաղացման ինչ ցուցակի մասին է խոսում, որովհետև այդ ցուցակում երբեք չի ընդգրկվել։