«Գոլդեն Փելիս» հյուրանոցը նախատեսվում է հավատարմագրային կառավարման տալ կամ վաճառել: Այդ մասին ԱԺ-ում հայտարարել է ՀՀ պետական գույքի կառավարման կոմիտեի նախագահ Նարեկ Բաբայանը՝ ի պատասխան «Իմ քայլը» խմբակցության պատգամավոր Թագուհի Թովմասյանի հարցի, թե ինչպես է պետությունը պատրաստվում օգտագործել հյուրանոցը:
«Գոլդեն Փելիս» հյուրանոցը պետությունը պատրաստվում է օգտագործել ըստ նշանակությա՞ն, թե այն դառնալու է պետական կառավարման ենթակայության տակ գտնվող այն շինություններից մեկը, որոնք կամաց-կամաց քանդվելու են: Արդեն ահազանգեր կան, որ երկու պատուհան կոտրվել է», - ասել է պատգամավորը, հայտնում է Aysor.am-ը:
Նարեկ Բաբայանն էլ նկատել է, որ հյուրանոցի հանձնման և ընդունման աշխատանքնեը դեռ ավարտված չեն: «Ընդունելուց հետո լավագույն առաջարկով այն պետք է տրվի կամ հավատարմագրային կառավարման, որպեսզի համապատասխան օպերատորը աշխատացնի որպես հյուրանոց կամ սակարկությունների ձևով հանվելու է մրցույթի կամ աճուրդի: Մենք չենք պահելու հենց այնպես և շատ կարճ ժամկետում մտադրություն ունենք հանձնել հավատարմագրային կառավարման կամ վաճառել», - ասել է նա:
Անդրադառնալով այն հարցին, թե ինչ ժամկետներում է նախատեսում ավարտել գործընթացը՝ Բաբայանն ասել է. «Հուսով եմ՝ մինչև նոր տարի»:
Ավելի վաղ հայտնի դարձավ, որ կառավարությունըորպես նվիրատվություն ընդունել է ՊԵԿ նախկին ղեկավար Արմեն Ավետիսյանի՝ Ծաղկաձորի «Գոլդեն Փելես» հյուրանոցը, այն կշահագործվի պետության կարիքների համար:
