«Պոբեդա» ավիաընկերությունը հոկտեմբերի 28-ից (երբ մեկնարկում է ձմեռային շրջանը) 25 եվրոյով կբարձրացնի արտերկրից դեպի Ռուսաստան իրականացվող թռիչքների տոմսերի գները: Այդ մասին հայտարարել է լոուքոսթերի ներկայացուցիչ Ելենա Սելիվանովան:

Ըստ նրա, ընկերությունը ստիպված է տոմսի գնի մեջ ներառել նաև գրանցման վարձը օտարերկրյա օդանավակայաններում, գրում է «Վեդոմոստին»:

Այդպիսով, Գյումրի-Մոսկվա չվերթին «Շիրակ» օդանավակայանից գրանցվելու համար 25 եվրո կգանձվի:

Հոկտեմբերի սկզբին Մոսկվայի քաղաքային դատարանն արգելել էր «Պոբեդային» գումար գանձել այդ ծառայության համար: Սելիվանովան այդ թանկացումը «աննախադեպ միանվագ աճ» է անվանել, քանի որ միջազգային չվերթներում տոմսի 4500 ռուբլի միջին գնի պայմաններում տոմսի արժեքն այժմ կբարձրանա 40 տոկոսով:

ՌԴ օդանավակայաններում «Պոբեդան» գրանցման համար լրացուցիչ գումար չի գանձում՝ այն չի համարվում լրացուցիչ ծառայություն և ներառված է օդանավակայանի ընդհանուր գանձումների և տոմսերի արժեքի մեջ: