ԱՊՀ երկրների փոփ երաժշտության առաջին փառատոնը կարող է տեղի ունենալ արդեն 2020 թվականին Ալմաթիում: Այդ մասին հայտնել է կոմպոզիտոր, ՌԴ ժողովրդական արտիստ Իգոր Կրուտոյը:
«Դեռևս վաղ է խոսել այդ նախագծի մասին, բայց նման մտքեր կան, և, հնարավոր է, այն կայանա: Դա կլինի Ալմաթիում: Իմ թիմը հիմա զբաղվում է դրանով` դիտարկում ենք, ինչպես անել, որ օրիգինալ լինի, չնմանվի մյուս փառատոներին»,-ասել է Կրուտոյը, հայտնում է ՏԱՍՍ-ը:
Ըստ Կրուտոյի, «Եվրատեսիլում» քվեարկությունը շատ քաղաքականացված է, ուստի առաջարկություններ եղան նման մի մրցույթ կազմակերպել: Եվ, անշուշտ, ցանկալի կլինի դուրս գալ ԱՊՀ շրջանակներից»,-ասել է նա:
Ավելի վաղ մի շարք ԶԼՄ-ներ հայտնել էին ՌԴ նախագահի հատուկ ներկայացուցիչ Միխայիլ Շվիդկոյի խոսքերն այն մասին, որ Ղազախստանն ու ՌԴ-ն մտադիր են համատեղ երաժշտական նախագիծ կյանքի կոչել: Ըստ Շվիդկոյի, Իգոր Կրուտոյը, հավանություն է տվել այդ գաղափարին:
