ԱԺ ԼՀԿ խմբակցության ներկայացուցիչ Հայկուհի Հարությունյանն ընտրվել է Կոռուպցիայի կանխարգելման հանձնաժողովի նախագահ: Հարությունյանից բացի նախագահի պաշտոնում ինքնաառաջադրվել էր նաև հանձնաժողովի մեկ այլ անդամ՝ Էդգար Շաթիրյանը:
Հարությունյանն ընտրվել է հանձնաժողովի անդամների 3 կողմ քվեով: Նա հանձնաժողովի անդամ էր ընտրվել ԱԺ «Լուսավոր Հայաստան» խմբակցությունից:
Հայկուհի Հարությունյանն իր ելույթում ասել է, որ կուռուպցիան որպես այդպիսի որևէ հասարակության շրջանում արմատախիլ չի արվել: Նա նշել է, որ նպատակ է դնում հասնել այնպիսի հաջողության, որի մասին կխոսի ամբողջ աշխարհը: Նա կարևորել է ՀՀ յուրաքանչյուր քաղաքացու մասնակցությունը կոռուպցիայի դեմ պայքարին և նշել, որ կրթական արշավներ է առաջարկելու բուհական համակարգում:
Կոռուպցիայի կանխարգելման հանձնաժողովում կառավարությունը ներկայացրել էր Լիլիթ Ալեքսանյանի, «Իմ քայլը»՝ Էդգար Շաթիրյանի, «Բարգավաճ Հայաստան»-ը՝ Նարեկ Համբարձումյանի, «Լուսավոր Հայաստան»-ը՝ Հայկուհի Հարությունյանի, և Բարձրագույն դատական խորհուրդը՝ Արամայիս Փաշինյանի թեկնածությունները: Նրանք բոլորն ընտրվեկլ են հանձնաժողովի անդամ:
