Կառավարությունը հարկային արտոնություններ է տվել ԱԺ նախկին պատգամավոր Սամվել Ալեքսանյանի դստեր ու Լիբանանի էներգետիկայի և ջրային պաշարների նախկին նախարար Արթյուր Նազարեանի որդիներին պատկանող «Անիտեքս» ընկերությանը:
Էկոնոմիկայի նախարար Տիգրան Խաչատրյանի խոսքով՝ ընդհանուր առմամբ, ընկերությունը մաքսատուրքից ազատման 972 մլն դրամի արտոնություն է ստացել։
«Անիտեքսը» պատրաստվում է Հայաստան ներմուծել հավելյալ 2.8 մլրդ դրամի սարքավորումներ Չինաստանից, Թուրքիայից, Հարավային Կորեայից, Հնդկաստանից՝ առանց ներմուծման մաքսատուրքը վճարելու։
Նշվում է, որ առաջին փուլով այն հումք է ներմուծել` տեքստիլի արտադրության համար (մանրաթելի, վերմակների, բարձերի արտադրություն), որի համար նախատեսված գումարը կազմել է մոտ 8.6 մլրդ դրամ, սակայն երկրորդ փուլով մոտ 2.8 մլրդ դրամի ապրանքների լրացուցիչ խմբաքանակ ներմուծելու անհրաժեշտություն է առաջացել:
Էկոնամիկայի նախարարի խոսքով՝ ընկերությունն արդեն ստեղծել է 44 նոր աշխատատեղ և վճարել է 697 մլն դրամ հարկ:
«Անիտեքս» ընկերությանը տրված առաջին արտոնության մասին խոսվել է 2018-ին։ Իրավաբանական անձանց ռեգիստրի տվյալների համաձայն՝ ընկերությունը գրանցվել է 2017-ի օգոստոսին։ Դրա հիմնական բաժնետերը Կիպրոսում գրանցված «Նաթքոմ լիմիթեդ» (NATCOM LIMITED) ընկերությունն է, որի բաժնետոմսերի 40 %-ը Աստղիկ Ալեքսանյանինն է, 30-ական տոկոս բաժնետոմս ունեն Լիբանանի էներգետիկայի և ջրային պաշարների նախկին նախարար Արթյուր Նազարեանի որդիները՝ Փիթըր և Գարի Նազարեանները:
