«Դիանա Հարությունյան» ֆեյսբուքյան կեղծ օգտատիրոջ գործով, հավանաբար, արդարացման դատական ակտ կլինի, Aysor.am-ի փոխանցմամբ, ասել է Փաստաբանների պալատի անդամ Վահան Հովհաննիսյանը:
Նրա խոսքով՝ Ազգային անվտանգության ծառայության լիազորությունը, պարտականությունն ու գործառույթը չէ բացահայտել համացանցում կեղծ տեղեկատվություն հրապարակող և տարածող օգտատերերին:
«Կեղծ օգտատիրոջ ցուցմունք-հայտարարությունից պարզ դարձավ, որ նրա նպատակները հիմնականում քաղաքական են։ Սա այն հանցակազմն է, որը շատ դժվար ապացուցելի է։ Եթե չլինի անձի ինքնախոստովանական ցուցմունք, գրեթե անհնար է ապացուցել, որ անձի գործողություններն ուղղված են հենց այդ նպատակին։ Այս դեպքում մենք սա չունենք, և, որքանով ինձ է հայտնի, նա ունի բավական փորձառու փաստաբան։ Կարծում եմ՝ այդ գործով ունենալու ենք արդարացման դատական ակտ», - նշել է Հովհաննիսյանը։
Հունվարի 5-ին ԱԱԾ-ն հայտարարություն էր տարածել՝ նշելով, որ «Դիանա Հարությունյան» ֆեյսբուքյան էջում կեղծ լուր տարածելու հետևանքով էական վնաս է հասցվել ՀՀ ազգային անվտանգության շահերին։ ԱԱԾ-ն բացահայտել էր ֆեյսբուքյան կեղծ էջը վարողի ինքնությունը, հարուցվել էր քրգործ, էջը վարողը ձերբակալվել էր:
