Ծննդականներում կնշվի երեխայի սեռը. Օրինագիծն անցել է 1-ին ընթերցումը
Ազգային ժողովն առաջին ընթերցմամբ ընդունել է ծննդյան վկայականներում երեխայի սեռը նշելու մասին օրինագիծը:
«Քաղաքացիական կացության ակտերի մասին» ՀՀ օրենքում լրացում կատարելու մասին օրինագիծը շրջանառության մեջ էր դրել «Լուսավոր Հայաստան» խմբակցությունը:
Գործող օրենքով ՀՀ քաղաքացիների ծննդյան վկայականներում երեխայի սեռը չի նշվում, ինչը, որոշ դեպքերում, խնդիրներ է առաջացնում, հատկապես արտերկրում: Կարող են լինել նաև այլ խնդիրներ, երբ միայն անունից հնարավոր չէ հասկանալ երեխայի սեռը։
ԼՀԿ խմբակցության ավելի վաղ տարածած փաստաթղթում նշված էր, որ երեխայի սեռի վերաբերյալ նշում պարունակում են գերմանական և ֆրանսիական ծննդյան վկայականները, այդ նշումը կատարվում է նաև ԱՄՆ շատ նահանգներում ու բազմաթիվ այլ երկրներում։
