ԱԺ «Լուսավոր Հայաստան» խմբակցության ղեկավար Էդմոն Մարուքյանը չի բացառում, որ «Իմ քայլի» առաջարկած սահմանադրական փոփոխությունների հանրաքվեի հարցով կարող են Սահմանադրական դատարան դիմելու նախաձեռնություն սկսել:

«Մենք գտնում ենք, որ հանրաքվեն արկածախնդրություն է, հանրաքվեն հարված է Հայաստանի Հանրապետության տնտեսությանը, հանրաքվեն հարված է մեր Սահմանադրությանը: Այս փոփոխությունների նախագիծը, այս գործընթացն ամբողջությամբ հակասում է ՀՀ Սահմանադրությանը, ամբողջությամբ հակասում է ՀՀ միջազգային պարտավորություններին, և այս քայլերով իշխանությունը հետ է տանում հայկական առաջ գնացած ժողովրդավարությունը»,- ասել է Մարուքյանը, գրում է «Ազատություն» ռադիոկայանը։

Փետրվարի 6-ին «Իմ քայլը» խմբակցությունն ԱԺ-ում անցկացրել է Սահմանադրության փոփոխությունների նախագիծը հանրաքվեի դնելու որոշումը։ Խմբակցությունը մի քանի նախագիծ էր բերել խորհրդարան, որոնցից մեկով առաջարկվում է մինչև Սահմանադրության փոփոխությունների ընդունումը նախագծի սահմանադրականությունը որոշելու նպատակով խորհրդարանի կողմից ՍԴ դիմելը դարձնել ոչ պարտադիր և դադարեցնել ՍԴ նախագահի ու անդամների պաշտոնավարումը։ Այն չի ընդունվել առաջին ընթերցմամբ՝ հարցը հանրաքվեի դնելու նպատակով։