Դատավոր դառնալու համար թեկնածուները պետք է հոգեբանական թեստ անցնեն, հայտարարել է ՀՀ արդարադատության նախարար Ռուստամ Բադասյանը:
Թեստի հարթակն օրենքի նոր նախագծի պահանջն է, որի էլեկտրոնային տարբերակն ապագայում պետք է մշակվի:
Նախագծով առաջարկվում է նաև դատավորների թեկնածուների տարիքը ներկայիս 28-ի փոխարեն նվազեցնել է 25-ի։ Բացի այդ. սահմանվել են դատավորների կոռուպցիոն ու կարգապահական խախտումների դեպքում վարույթներ հարուցելու կարգերը։
Նախատեսվում է նաև ստեղծել Դատավորների գործունեության գնահատման հանձնաժողով, որը բաղկացած կլինի 5 անդամից և կքննարկի դատավորների կողմից գործերի բաշխման, ողջամիտ ժամկետում քննարկման հարցերը, նիստի ընթացքում դատավորի վարքագծի հետ կապված խնդիրները։
Անդրադառնալով դատաիրավական համակարգի բարեփոխումները հենց դատական համակարգից սկսելուն՝ նախարարը նշել է, որ դատական իշխանությունն է անկյունային դեր խաղում արդարադատության կայացման մեջ։
Առաջարկվող փոփոխությունները ներկայացնելով՝ Բադասյանը հայտնել է, որ օրենսդրական նախագծերի փաթեթը լայն քննարկում և միջազգային փորձաքննություն է անցել, արժանացել Վենետիկի հանձնաժողովի դրական եզրակացությանը։