Թեհրանից ժամանել է հերթական և, կարծես, այս պահին վերջին ինքնաթիռը` ՀՀ 82 քաղաքացիով, հայտնել է առողջապահության նախարար Արսեն Թորոսյանը ֆեյսբուքյան իր էջում։
«Նրանց կրկին ուղեկցել էր մեր մասնագետը՝ հենց Թեհրանից հետևելով նրանց ինքնազգացողությանը և օբյեկտիվ ախտանշաններին։ Ուղևորներից ոչ մեկ չի ունեցել բարձր ջերմություն կամ սուր շնչառական վարակի ախտանիշ։ Նրանք բոլորը կգտնվեն տնային հսկողության տակ», - նշել է նա։
Նախարարը հավելել է, որ մինչ օրս կատարվել է 108 լաբորատոր տեստ. բոլորը եղել են բացասական։
Հայաստանը փետրվարի 25-ից 2 շաբաթով փակել է Իրանի հետ սահմանը: Ըստ որոշման՝ դադարեցվել է Իրան-Հայաստան օդային հաղորդակցությունը ու մասամբ սահմանափակվել է Մեղրիի անցակետով մուտքը ՀՀ։ Իրանից Հայաստան ինքնաթիռներով տարհանվել են ՀՀ քաղաքացիներ, երկիր եկող բեռնատարները ոստիկանությունն է ուղեկցում:
