Ադրբեջանական սահմանապահ զորքերի ստորաբաժանումները Տավուշի հատվածում մարտի 6-ին կրկին դիմել են սադրիչ գործողությունների, ֆեյսբուքյան իր էջում հայտնել է պաշտպանության նախարարության մամուլի խոսնակ Արծրուն Հովհաննիսյանը:
«Արդեն մի քանի օր է նույն ուղղությամբ ադրբեջանական սահմանապահ ստորաբաժանումները կրակում են մեծ տրամաչափի գնդացիրներից։ ՀՀ ԶՈւ-երի ստորաբաժանումները, որպես կանոն դրսևորում են զսպվածություն, սակայն թիրախային կրակոցներն անպատասխան չեն մնալու»,- գրել է Հովհաննիսյանը՝ հավելելով, որ սադրանքների ամբողջ պատասխանատվությունը մնալու է ադրբեջանական կողմի վրա:
Փետրվարի 24-ին ադրբեջանական ԶՈւ-երի ստորաբաժանումները կրակ են բացել ՀՀ ԶՈւ-երի ստորաբաժանումների մարտական դիրքերի ուղղությամբ: Կրակից թեթև վիրավորում էր ստացել մեկ հայ զինծառայող: