ՀՀ սփյուռքի գործերի գլխավոր հանձնակատարի գրասենյակը մեկնարկում է «իԳործ» ծրագիրը՝ նախատեսված սփյուռքահայ մասնագետներին համար: Նրանց հրավիրում են աշխատելու ՀՀ պետական մարմիններում:
Դիմելու համար անհրաժեշտ է ունենալ մագիստրոսի կամ ավելի բարձր գիտական աստիճան:
Ըստ պետօղակների ներկայացրած մասնագիտական կարիքների՝ ծրագրի շրջանակում սփյուռքահայ մասնագետները գործունեություն կծավալեն ՀՀ գրեթե բոլոր նախարարություններում և Կառավարությանն առընթեր մարմիններում: Նրանք իրենց սեփական փորձն ու գիտելիքները կներդնեն համապատասխան ոլորտների բարելավման և զարգացման, քաղաքականությունների և ծրագրերի մշակման գործում:
Սփյուռքի գործերի գլխավոր հանձնակատարի գրասենյակը մասնակիցներին կտրամադրի ավիատոմս և ամսական 336,000 դրամ՝ կեցության ծախսերը հոգալու համար: Ծրագիրը կտևի մեկ տարի և կմեկնարկի հուլիսի 1-ից:
Մասնակցելու համար անհրաժեշտ է մինչև ապրիլի 15-ը լրացնել հայտադիմումը:
Ծրագիրը նպատակ ունի նպաստելու պետկառավարման գործում սփյուռքի ինտելեկտուալ ներուժի ներգրավմանը և մասնագիտական հայրենադարձության գործընթացի ակտիվացմանը: