Իրենց «Հեղափոխության պահապաններ» կոչող խումբը վարչապետ Նիկոլ Փաշինյանին հայհոյած տղամարդուն ստիպել է ներողություն խնդրել՝ տեսախցիկները միացրած գնալով, ամենայն հավանականությամբ, նրան պատկանող տարածք:
Տեսանյութում լսվում է, թե ինչպես է խմբի անդամներից մեկն ասում, թե տղամարդը երկու տարբերակ ունի՝ ներողություն խնդրել վարչապետից կամ «պատասխան տալ»:
Տեսանյութի վերջում խմբի հիմնադիրը հայտարարում է, որ այդ մարդուն պետք չէ հետապնդել, քանի որ նա զղջացել է իր արարքի համար, և հենց այդ պատճառով երիտասարդի դեմքը չեն նկարել:
«Ինքը զղջում է իր ասածների համար, եթե վարչապետն ուրիշ հրահանգ կտա, կլինի ուրիշ բան, չի տա, ուրեմն այսքանով այս թեման փակվում է»,- հայտարարել է նա:
PanARMENIAN.Net-ը կապվեց ՀՀ ոստիկանության լրատվության վարչության պետի տեղակալ Էդգար Ջանոյանի հետ՝ պարզելու՝ արդյոք ծանոթ են հրապարակմանը, և չկա արդյոք այս գործողություններում օրենքի խախտում: Վերջինս տեղեկացրեց, որ հրապարակմանը ծանոթ են, ոստիկանությունում այն կուսումնասիրվի և լրացուցիչ կտեղեկացնեն:
Տեսանյութում երևացող և ներողություն պահանջող տղամարդկանցից մեկը նաև «Հայելի» մամուլի ակումբի վրա հարձակվողներից էր: 2019-ի աշնանը մի քանի հոգի ձվեր էին նետել և պաստառներ փակցրել ակումբի դռանն ու պատերին` «Ալիևի ուշացած, բայց հուժկու պատասխանը Փաշինյանին» վերտառությամբ նյութի համար: