«Ավրորա» նախաձեռնության #AraratChallenge շարժման հանգանակությունները կուղղվեն կորոնավիրուսի դեմ պայքարող բժիշկների աջակցությանը՝ տրամադրելով թոքերի արհեստական շնչառության 10 սարք Հայաստանի հիվանդանոցներին: Այդ մասին ասվում է նախաձեռնության համահիմնադիրների հայտարարության մեջ։
«Այս պանդեմիան փոխել է համաշխարհային օրակարգը: Մինչ աշխարհն ուժերը կենտրոնացրել է պատվաստանյութ արտադրելու և վնասը նվազագույնի հասցնելու վրա, փախստականներն ու խոցելի մյուս համայնքները, որոնց անվերապահորեն աջակցում է «Ավրորան», շարունակում են տառապել և COVID-19 վիրուսի պատճառով բախվել լրացուցիչ այլ դժվարությունների: Մեզ համար կարևոր է տեսադաշտից դուրս չթողնել նրանց խնդիրները»,- ասվում է նախաձեռնության հայտարարության մեջ։
Դրանում նաև նշվում է, որ յուրաքանչյուր օր աշխարհում ավելի ու ավելի շատ մարդ է օգնության կարիք ունենալու, և դրա տրամադրումը «Ավրորայի» պարտականությունն է։
Նախաձեռնությունը բոլորին կոչ է անում միանալ «Ավրորայի»՝ ճգնաժամը հաղթահարելու ջանքերին:
Ավելի վաղ հայտնի դարձավ, որ Moderna Therapeutics ընկերությունը, որի համահիմնադիրը և գլխավոր տնօրենը հայազգի գործարար Նուբար Աֆեյանն է, կորոնավիրուսի դեմ պայքարող պատվաստանյութի առաջին խմբաքանակն է ուղարկել փորձարկման
ՀՀ-ում մարտի 16-ից մինչև ապրիլի 14-ն արտակարգ դրություն է՝ կորոնավիրուսի տարածումը կանխելու համար: Հայաստանում մարտի 23-ի առավոտվա դրությամբ կորոնավիրուսով վարակի դեպքերի թիվը 194 է, որից 2-ն ապաքինվել է։
Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով:
