Արցախի նախագահ Բակո Սահակյանը մարտի 23-ին շնորհավորական ուղերձ է հղել Աբխազիայի նորընտիր նախագահ Ասլան Բժանիային:
Ուղերձում, մասնավորապես, ասված է, որ Արցախում բարձր են գնահատում Աբխազիայի հետ բարեկամության և սերտ գործակցության ավանդույթների վրա հիմնված հարաբերությունները:
«Համոզված եմ, որ մեր երկրների և ժողովուրդների միջև կապերը հետագայում ևս կընդլայնվեն ու կխորանան:
Կրկին շնորհավորում եմ Ձեզ, հարգարժան Ասլան Գեորգիի, պետության ղեկավարի բարձր եւ պատասխանատու պաշտոնում ընտրվելու կապակցությամբ»,- նշել է Սահակյանը:
Արցախի նախագահը նաև բարեկեցություն և հաջողություններ է մաղթել Բժանիային իր բոլոր նախաձեռնություններում՝ հանուն Աբխազիայի խաղաղության և բարգավաճման:
Մարտի 22-ին անցկացված Աբխազիայի նախագահի ընտրություններում հաղթել է ընդդիմության առաջնորդ Ասլան Բժանիան։