ՌԴ Յարոսլավլի շրջանում ՀՀ պատվավոր հյուպատոս Վահագն Խաչատրյանը, որը Պերեսլավլ Զալեսսկի քաղաքի բնակիչ է, 100,000 բժշկական դիմակ է անհատույց տրամադրել տեղի շրջանային հիվանդանոցին։ Նա փոխանցել է նաև ախտահանիչ միջոցներ և վիտամինացված հյութեր կորոնավիրուսի դեմ պայքարի համար, գրում է Rusarminfo-ն։

«Մենք ավելի քան 20 տարի է՝ այս քաղաքում ենք ապրում և քաղաքի բոլոր հարցերն ու խնդիրները նաև մերն են։ Այսօր մենք գիտենք, թե ինչ մարտահրավերի առջև է կանգնած ամբողջ աշխարհը, այդ թվում՝ մեր երկիրը, մեր շրջանը։ Մենք մեր կողմից մեր համեստ ավանդն ենք բերում՝ ով իր վարքով, ով ֆինանսներով»,- ասել է Խաչատրյանը։

Պերեսլավլ Զալեսսկի հիվանդանոցի գլխավոր բժիշկ Կիրիլ Խարչիկովը ֆեյսբուքյան իր էջում շնորհակալություն է հայտնել հայազգի գործարարին՝ ցուցաբերած օգնության համար։