Ազգային ժողովը մեկ անգամ ևս առաջին ընթերցմամբ արտահերթ նիստում ընդունել է Կառավարության առաջարկած օրինագծերի փաթեթը, որով նախատեսում է կորոնավիրուսով հիվանդների ու մեկուսացվածների տեղաշարժի մասին տեղեկատվության ստացում հեռախոսների միջոցով։
Քվեարկության էր դրվել «Արտակարգ դրության իրավական ռեժիմի մասին» և «Էլեկտրոնային հաղորդակցության մասին» օրենքներում լրացումների մասին օրինագծերի փաթեթը։
Երկրորդ ընթերցումը պետք է լինի 24 ժամվա ընթացքում։
Ավելի վաղ, մարտի 31-ին ԱԺ-ում օրենքը չէր ընդունվել: Նոր նիստին ընդդիմությունը չի ներկայացել․ ԼՀԿ խմբակցության ղեկավար Էդմոն Մարուքյանը, մասնավորապես, հայտարարել է, որ նրանց ուշ են տեղեկացրել։
Փոփոխությունները հնարավորություն են տալու կորոնավիրուսով հիվանդների ու մեկուսացման մեջ գտնվողների տեղաշարժին հեռախոսների միջոցով հետևելու ու այդկերպ պարզելու նրանց շփման շրջանակը։
Ըստ փոփոխության՝ օպերատորները պետք է պետությանը տրամադրեն հաճախորդին տեղորոշող տվյալներն ու նրա կատարած զանգերի սկզբի, ավարտի ու հնարավոր վերահասցեագրման (ոչ զանգերի բովանդակության) տվյալները։ Դրանք ենթակա են ապաանձնավորման ու հետագա ոչնչացման։
