Իտալիայից Հայաստան վերադառնալու ցանկություն ունեցող քաղաքացիները հնարավորություն ունեն օգտվելու Հռոմ-Մինսկ-Երևան չվերթից։ Այդ մասին ֆեսյբուքյան էջում տեղեկացնում է Իտալիայում ՀՀ դեսպանությունը։

Նշվում է, որ ըստ «Բելավիա» ընկերության պաշտոնական կայքի՝ ապրիլի 24-ի և դրանից հետո ընկած ժամանակահատվածի համար նախատեսված թռիչքների տոմսեր կան։

«Այս հայտարարությունը կրում է տեղեկատվական բնույթ և Իտալիայում ՀՀ դեսպանությունը պատասխանատվություն չի կրում փոփոխվող հանգամանքների պատճառով Հռոմ-Մինսկ-Երևան թռիչքի հնարավոր չեղարկման համար»,- ասվում է գրառման մեջ։

Ավելի վաղ ՀՀ կառավարությունը միջոցներ էր ձեռնարկել Իտալիայում գտնվող իր քաղաքացիների Հայաստան վերադարձնելու ուղղությամբ։ Միլանից Երևան առաջին ինքնաթիռը ժամանել է մարտի 10-ին, ևս մեկ ինքնաթիռ է ժամանել մարտի 16-ին՝ Հռոմից։

Մարտի 13-ից կորոնավիրուսի տարածումը կանխելու համար Ryanair բյուջետային ավիաընկերությունը կասեցրել է դեպի Իտալիա և այդ երկրից բոլոր չվերթերը։