Ապրիլի 29-ի՝ ժամը 15:00-ի և 17:25-ի սահմաններում, արցախա-ադրբեջանական հակամարտ զորքերի շփման գծի արևելյան (Մարտունի) հատվածում տեղակայված հայկական առաջապահ դիրքերի ուղղությամբ հակառակորդը կիրառել է 60 մմ-ոց ականանետեր, հայտնում են Պաշտպանության բանակից:
Միջադեպի արդյունքում ՊԲ ստորաբաժանումները որևէ կորուստ չեն կրել, հայկական ստորաբաժանումների կողմից ձեռնարկված պատասխան գործողություններից հետո հակառակորդի ակտիվությունը ճնշվել է:
Սա 2019-ի հունիսից ի վեր ադրբեջանական զինուժի կողմից հայկական դիրքերի ուղղությամբ ականանետային զինատեսակի կիրառման առաջին դեպքն է:
ՊԲ-ից հայտնում են, որ օրվա ընթացքում շփման գծի տարբեր հատվածներում հրադադարի ռեժիմի խախտման դեպքեր են արձանագրվել նաև հրաձգային այլ զինատեսակներից: Այս պահի դրությամբ առաջնագծում իրավիճակը հանգիստ է:
Ապրիլի 21-ին ՊԲ հակաօդային պաշտպանության ստորաբաժանումների կողմից հարավային հատվածում անօդաչու թռչող սարք էր խոցվել: