Արտաշատի բժշկական կենտրոնից դուրս է գրվել կորոնավիրուսից բուժված 91-ամյա Ռոզա Մարտիրոսյանը, հայտնել է Արարատի մարզպետ Գարիկ Սարգսյանը:
«Մարտիրոսյանն ունի 5 երեխա, 32 թոռ ու ծոռ: Թե ումից է կորոնավիրուսով վարակվել, Ռոզա Մարտիրոսյանը չգիտի, բայց նշում է, որ հարևանների մեջ վարակվածներ եղել են, նույնիսկ թոռն է վարակվել, որն իր հետ չի բնակվում»,- գրել է մարզպետը։
Ավելի վաղ «Սուրբ Գրիգոր Լուսավորիչ» հիվանդանոցում կորոնավիրուսից բուժվել ու դուրս էր գրվել 96-ամյա մի տղամարդ։
Հայաստանում հունիսի 11-ի դրությամբ կորոնավիրուսով վարակի դեպքերը հասել են 14,669-ի։ Ընդհանուր առմամբ, կորոնավիրուսից մահվան 245 դեպք կա, այլ պատճառով՝ 82։ Առողջացածների ընդհանուր թիվը 5466 է։