ԱԺ «Իմ քայլը» խմբակցության մի շարք պատգամավորներ շրջանառության մեջ են դրել Սահմանադրության փոփոխությունների նախագիծ, որը ենթադրում է ՍԴ նախագահ Հրայր Թովմասյանի լիազորությունների դադարեցում։

Ըստ գործող նորմերի՝ ՍԴ ներկայիս նախագահը պաշտոնավարելու է մինչև 2035 թվականը։

Նախագծով առաջարկվում է օրենքով ամրագրել, որ մինչև Սահմանադրության 7-րդ գլխի ուժի մեջ մտնելը, նշանակված և ՍԴ անդամի կամ դատավորի պաշտոնում ոչ պակաս, քան 12 տարի պաշտոնավարած անդամի (դատավորի) լիազորությունների ժամկետը համարվի ավարտված, և պաշտոնավարումը դադարեցվի:

Նախատեսվում է, որ մինչև նույնը 7-րդ գլխի ուժի մեջ մտնելը ՍԴ գործող նախագահի լիազորությունները դադարեցվեն և ՍԴ կազմից նոր նախագահ ընտրվի։

Ըստ նախագծի՝ ՍԴ այն դատավորները, ում պաշտոնավարման ժամկետը չի դադարեցվում, կպաշտոնվարի մինչև 12 տարին լրանալը (հաշվի կառնվի նաև մինչև Սահմանադրության 7-րդ գլխի ուժի մեջ մտնելը որպես ՍԴ անդամ պաշտոնավարած ժամկետը):

Նախատեսվում է, որ Սահմանադրության փոփոխություններն ուժի մեջ են մտնում պաշտոնական հրապարակմանը հաջորդող օրվանից:

«Իմ քայլը» խմբակցությունը 2020-ի սկզբին արդեն մեկ անգամ առաջարկել էր նման նախագիծ, սակայն հետո որոշվեց հարցը հանրաքվեի դնել: Սակայն, կորոնավիրուսի համավարակով և արտակարգ դրությամբ պայմանավորված խորհրդարանն ընդունել է սահմանադրական փոփոխությունների հանրաքվեի որոշումը հետ կանչելու վերաբերյալ նախագիծը։