ԲՀԿ-ական պատգամավոր Նաիրիա Զոհրաբյանը, ֆեյսբուքյան իր էջում հրապարակված տեսանյութում անդրադառնալով կորոնավիրուսի հետ կապված իրավիճակին և ոլորտի պատասխանատուների գործողություններին, մի դեպքի մասին է բարձրաձայնել, երբ մորաքրոջը հուղարկավորել են, իսկ ինքնահողի օրը կինը զանգել է հարազատներին և հանդիմանել, թե ինչու չեն զանգում, չեն հետաքրքրվում իր որպիսիությամբ։
Նա հավելել է, որ չունի հարազատների թույլտվությունը ձայնագրությունը հրապարակելու համար, սակայն տեղյակ է, որ արդեն արտաշիրիմում է կատարվել՝ պարզելու, թե ում են հուղարկավորել կնոջ փոխարեն։
Նա ցավալի է համարել, որ ոլորտի պատասխանատուները ձախողել են համավարակի դեմ պայքարը, իսկ «երբ ամեն ինչ տապալում են, մնում է ցինիզմն ու անպատասխանատվությունը»։
Նա հիշեցրել է մեկ այլ դեպքը, երբ հարազատներն իրենց տատիկի փոխարեն այլ կնոջ էին հուղարկավորել, իսկ պարետը, կամ առողջապահության նախարարը ներողություն չեն խնդրել ցավալի դեպքի համար:
Ավելի վաղ Զոհրաբյանն ահազանգել էր, որ հունիսի 29-ին Երևանի Սբ Գրիգոր Լուսավորիչում մահացել է գյումրեցի կին, ում մարմինը թոռներին չի հաջողվում գտնել։ Ավելի ուշ հայտնի դարձավ, որ անփութության արդյունքում տատիկին հանձնել էին այլ անձանց, որպես իրենց հանգուցյալ, և տատիկը հուղարկավորվել էր Նոր Հաճնի գերեզմանոցում։ Սահմանված կարգով կիրականացվի արտաշիրիմում և տատիկի դին կտեղափոխվի Գյումրի։
ԲՀԿ-ն ու ԼՀԿ-ն Covid-19-ի տարածման քննիչ հանձնաժողով ստեղծելու հարցով դիմել էին Միրզոյանին, իրավունքի ուժով հանձնաժողովը ստեղծվել է, որը կսկսի գործել սեպտեմբերին։