Ընտանեկան կարգավիճակի մասին տեղեկանքը հնարավոր կլինի ստանալ էլեկտրոնային տարբերակով։ Այդ մասին ֆեյսբուքյան իր էջում տեղեկացրել է ՀՀ արդարադատության նախարար Ռուստամ Բադասյանը։
Ընտանեկան կարգավիճակի մասին տեղեկանքը կամ ամուսնության բացակայության մասին տեղեկանքը հիմնականում անհրաժեշտ է լինում Հայաստանի տարածքից դուրս ամուսնություն գրանցելու համար։
«Արդարադատության նախարարությունը գործարկել է հարթակ, որի արդյունքում այլևս հարկավոր չէ այցելել նախարարություն, իսկ արտասահմանում գտնվելու դեպքում՝ հյուպատոսություն, կամ լիազորագիր և հայտարարություն ուղարկել տեղեկանքը ստանալու համար», ասվում է գրառման մեջ։ Նախարարը նաև հարթակից օգտվելու մանրամասների մասին տեսանյութ է հրապարակել։
Բադասյանը հավելել է, որ նախարարությունը շարունակելու է թվային լուծումների միջոցով կյանքը հեշտացնելուն ուղղված աշխատանքները։
