Հուլիսի 15-ի ժամը 16:00-ի դրությամբ սահմանին հիմնականում պահպանվում է հրադադար, տեղեկացրել է ՀՀ պաշտպանության նախարարի մամուլի խոսնակ Շուշան Ստեփանյանը։ Նա նշել է, որ միջադեպեր և հակառակորդի կողմից թիրախավորված կրակոցներ չեն արձանագրվել։
«Իրավիճակը սահմանի ամբողջ երկայնքով ՀՀ ԶՈւ ստորաբաժանումների լիակատար վերահսկողության ներքո է»,- նշել է նա։
Հուլիսի 14-ի ժամը 23:15-ից մինչ առավոտ պահպանվել է հարաբերական անդորր, գիշերվա ընթացքում հրետանային միջոցներ չեն կիրառվել։
Հուլիսի 12-ից հայ-ադրբեջանական սահմանին ռազմական գործողություններ են ընթանում, որոնք հրահրել է Ադրբեջանը: Բոլոր հրետակոծությունները թիրախավորվում են ՀՀ ԶՈւ կրակով և լռեցվում: Ադրբեջանը պաշտոնապես 11 զոհի մասին է հայտնել: Հայաստանն ունի 4 զոհ և մոտ 20 վիրավոր։ Ադրբեջանական ԶՈւ-ն նաև ականակոծել է Չինարին, Այգեպարը, Ներքին Կարմիրաղբյուր համայնքները, հրետակոծության է ենթարկվել նաև Բերդ քաղաքը։