Հայաստանում կորոնավիրուսային վարակի նվազման հետ կապված Դիլիջանի բժշկական կենտրոնը վերադառնում է իր նախկին աշխատանքային ռեժիմին: Այդ մասին ասվում է ԲԿ-ի ֆեյսբուքյան էջում։
Հունիսի 12-ից մինչև հուլիսի 31-ը Դիլիջանի բժշկական կենտրոնում բուժում է ստացել Covid-19 դրական մոտ 200 մարդ:
«Դիլիջան ԲԿ-ի Covid-19 բաժանմունքն օգոստոսի 1-ից այլևս չի գործում: Շենքն ամբողջությամբ ախտահանվել է, գործում է նախկին բնականոն հունով և պատրաստ է ընդունել պացիենտների»,- ասվում է գրառման մեջ:
«Էրեբունի» և «Նաիրի» բժշկական կենտրոնների մասնագետների այցերը կվերսկսվեն:
ՀՀ-ում կորոնավիրուսի համաճարակով պայմանավորված բազմաթիվ բուժհաստատություններ, ինչպես Երևանում, այնպես էլ մարզերում, վերապրոֆիլավորվել էին վարակի դեմ պայքարելու համար։ Հայաստանում օգոստոսի 4-ի դրությամբ կորոնավիրուսով վարակի դեպքերը հասել են 39,298-ի: