Ամուլսարի տարածքից «Լիդիանի Արմենիայի» պահնորդների տեղադրած վագոն-տնակը տեղափոխվել է վերամբարձ կռունկի միջոցով։ Կտեղափոխվեն նաև Ամուլսարի պահապանների տնակները։

Ոստիկանական պատը թույլ չի տվել ապամոնտաժման ժամանակ «Լիդիանի» պահնորդական խմբին միջամտել գործողություններին:

Ամուլսարի մերձակա տարածքում իրավիճակը վերջին օրերին լարվել էր, ոստիկանների և հանքի շահագործման դեմ բողոքող քաղաքացիների միջև բախումներ են եղել, բերման ենթարկվածներ են եղել։

Օգոստոսի 7-ի առավոտից Ամուլսարի պահապանները սպասում էին «Լիդիանի» տեղադրած վագոն-տնակի տեղափոխմանը։ Բողոքի ակցիաները սկսել էին օգոստոսի 4-ին, երբ «Լիդիան Արմենիայի» պահնորդները տեղափոխել էին Ամուլսարի պահապաններին պատկանող վագոն-տնակը ու դրա փոխարեն դրել իրենցը:

Ջերմուկում Ամուլսարի ակցիայի մասնակիցների հիմնական պահանջը մնում է ՇՄԱԳ-ն անվավեր ճանաչելը։

«Լիդիան Արմենիան» Ամուլսարի ոսկու հանքի շահագործման հնարավորություն ունեցող ընկերությունն է։ Հանքի շահագործումն այժմ կասեցված է բնապահպանների ցույցերի ու բողոքների պատճառով։ 2018-ից այնտեղ ակտիվիստները փակել են հանք տանող ճանապարհն ու պահանջում են դադարեցնել դրա ահագորոծումը, քանի որ տարածքն էկոլոգիական վտանգի տակ է հայտնվում։

Ամուլսարի հանք տանող ճանապարհն արգելափակվել է 2018-ի հունիսից: Մինչ օրս «Ամուլսարի պահապանները» հերթապահում են հանքի մատույցներում՝ թույլ չտալով հանքի շահագործումը։ ՀՀ կառավարության պետական բյուջեից մոտ $370,000 գումար հատկացրել էր միջազգային ELARD ընկերությանը, որը պետք է փորձաքննություն անցկացներ Ամուլսարի հանքի շահագործման վերաբերյալ։ Ընկերությունը եկել էր եզրակացության, որ հանքի «ճիշտ» շահագործման դեպքում ՝ բնապահպանական ռիսկերը կլինեն կառավարելի։