2020-ին Սևանի ափամերձ հատվածներում նախատեսվում է մաքրել մոտ 270 հեկտար ափամերձ անտառաշերտ։ Շրջակա միջավայրի նախարար Ռոմանոս Պետրոսյանը Գեղարքունիքի մարզ կատարած այցի շրջանակում հետևել է Սևանա լճի ափամերձ հատվածների անտառաշերտի մաքրման աշխատանքներին, որոնք ընթանում են ամենօրյա ռեժիմով։ Այդ մասին ֆեյսբուքյան իր էջում տեղեկացրել է նախարարի մամուլի խոսնակ Դավիթ Գրիգորյանը։

Օգոստոսի 9-ի դրությամբ ամբողջությամբ մաքրված է մոտ 50 հեկտար։

Շրջակա միջավայրի նախարար Ռոմանոս Պետրոսյանն ու Գեղարքունիքի մարզպետ Գնել Սանոսյանը համատեղ շրջայց են կատարել Սևանա լճի ափամերձ հատվածների խնդրահարույց այն տարածքներում, որտեղ առկա են ապօրինի շենք-շինություններ ու պարիսպներ, որոնք արգելափակում են քաղաքացիների անխոչընդոտ մուտքը լճի ափ։

Դիտարկվում են նաև ջրի տակ անցած այն շենք-շինությունները, որոնց շուտափույթ ապամոնտաժման ուղղությամբ այժմ նախաձեռնվում են իրավական համալիր գործընթացներ։

2019թ․ Սևանում մաքրվել էր մոտ 140 հեկտար ափամերձ անտառաշերտ։