Բելառուսի նախագահի թեկնածու Սվետլանա Տիխանովսկայան, որը երկիրը լքել էր ընտրություններից հետո, նոր տեսաուղերձ է հրապարակել։ Թեկնածուն իշխանություններին կոչ է արել վերջ տալ բռնությանը և գնալ երկխոսության։ Նա խնդրել է քաղաքապետներին օգոստոսի 15-ին և 16-ին խաղաղ զանգվածային հավաքներ կազմակերպել։

Նրա խոսքով՝ դեռ կես տարի առաջ ոչ մեկ չէր հավատում, որ բելառուսցիները կարող էին միավորվել և ոչ ասել հին իշխանություններին։ Բայց դա տեղի ունեցավ, մարդիկ գնացին ընտրական տեղամասեր և կատարեցին իրենց ընտրությունը։ Տիխանովսկայան շնորհակալություն է հայտնել նրանց, ովքեր քվեարկել են իր և երկրում փոփոխությունների օգտին։

Թեկնածուն նշել է, որ փոփոխություն ցանկացողները մեծամասնություն են, ինչին կա փաստաթղթային հաստատում՝ արձանագրությունների կրկնօրինակներ։ Այնտեղ, որտեղ հանձնաժողովը արդար է հաշվել, իրեն աջակցողները կազմել են 60-70%:

«Եկեք միասին պաշտպանենք մեր ընտրությյունը։ Ստորագրեք այս հղումով, որ քվեարկել եք իմ՝ Սվետլանա Տիխանովսկայայի օգտին։ Անտարբեր մի մնացեք։ Մեր ձայները պետք է լսելի լինեն», - ասել է նա։

Բելառուսում օգոստոսի 9-ին կայացած նախագահական ընտրություններից հետո ԿԸՀ-ն հայտարարել է, որ գործող նախագահ Ալեքսանդր Լուկաշենկոն հավաքել է ձայների 80.23%-ը, իսկ Տիխանովսկայան՝ 9.9%։ Օգոստոսի 10-ին նախագահի ընդդիմադիր թեկնածու Սվետլանա Տիխանովսկայան հայտարարել էր, որ չի ընդունում ընտրությունների արդյունքները և պատրաստ է պայքարել։ Հաջորդ օրը հայտնի էր դարձել, որ նա լքել է Բելառուսը։

Նախագահական ընտրությունների ավարտից հետո երկրում հակակառավարական ցույցեր են անցկացվում, որոնք ուղեկցվում են ոստիկանության կողմից բռնի ուժի կիրառմամբ։ Հայտնի է, որ մի քանի օրում ամենաքիչը 6000 մարդ է բերման ենթարկվել և ձերբակալվել։