«Գյումրի բժշկական կենտրոնի մի խումբ բժիշկ-վիրաբույժներ վիրահատություններ են արել, որոնք գրանցել են որպես պետպատվերով իրականացվող ծառայություն, սակայն հիվանդներից պահանջել են ամբողջ գումարը: Արդյունքում պետությունից և հիվանդներից խարդախությամբ հափշտակվել է 1.8 մլն դրամ, հայտնում են Գլխավոր դատախազությունից։
Վիրահատությունները ձևակերպել են որպես համավճարի շրջանակում մատուցվող ծառայություններ և կազմել կեղծ պայմանագրեր: Արդյունքում հիվանդներից գանձված գումարներից ԲԿ–ի դրամարկղ մուտքագրվել է միայն համավճարի շրջանակում սահմանված գումարը` 50,000-65,000 դրամ։
ՀՀ քրեական օրենսգրքի 178-րդ հոդվածի 2-րդ մասի տարբեր կետերով (խարդախություն), որոշ դեպքում նաև 325-րդ հոդվածի 1-ին մասով (փաստաթղթեր կեղծելը) մեղադրանքներ են առաջադրվել ԲԿ–ի մի խումբ բժիշկների: Հետագայում առաջադրված մեղադրանքների մի մասով համաներման ակտի կիրառման, վաղեմության ժամկետն անցնելու, գործուն զղջալու հիմքով բժիշկների նկատմամբ քրեական հետապնդումը դադարեցվել է և քրեական գործի վարույթը կարճվել:
Հիվանդանոցային բուժօգնություն և սպասարկում իրականացնող հաստատությունների տնօրեններին հանձնարարվել է պետության կողմից երաշխավորված անվճար բժշկական օգնության և սպասարկման կարիք ունեցող պացիենտներին տրամադրել իրազեկման թերթիկներ: