Արցախի պաշտպանության նախարարությունը միջնորդագիր է ներկայացրել Ապրիլյան պատերազմում զոհված կապիտան Արմենակ Ուրֆանյանին «Արցախի հերոս» բարձրագույն կոչում շնորհելու վերաբերյալ, հայտարարել է ԱՀ նախագահ Արայիկ Հարությունյանը։
«Արմենակ Ուրֆանյանի անձնուրաց ու հայրենանվեր պահվածքի մասին ժամանակին բազմաթիվ քննարկումներ են եղել: Նրա հերոսական կերպարն ըստ արժանավույն գնահատելու համար, դա, կարծում եմ, Արցախի Հանրապետության օրվա լավագույն որոշումը կլինի: Սիրով և հպարտությամբ կհաստատեմ»,- գրել է Հարությունյանը։
Ուրֆանյանը Պաշտպանության բանակի զինծառայող, զինված ուժերի կապիտան էր, զոհվել է 2016 թվականի Քառօրյա պատերազմի ժամանակ։ Ուրֆանյանն իր հրամանատարության տակ գործող հրաձգային վաշտի անձնակազմի հետ երկարատև մարտ է մղել հանկարծակի հարձակում գործած հակառակորդի հետ։ Անձնակազմին հետ ուղարկելով՝ կապիտան Ուրֆանյանը միայնակ շարունակել է մարտը՝ այդ ընթացքում խոցելով մեկ տանկ և թշնամու մոտ մեկ տասնյակ զինվորներ։ Գերի չընկնելու համար՝ իր մոտ մնացած վերջին նռնակով իր հետ միասին պայթեցրել է մոտեցող թշնամու խումբը՝ նրանց պատճառելով զգալի մարդկային կորուստներ:
