Նախագահ Արմեն Սարգսյանի հրամանագրով հայտնի բժիշկ Հագոպ (Հրայր) Հովագուիմիանին շնորհվել է Ազգային հերոսի բարձրագույն կոչում՝ բազմաթիվ մարդկային կյանքեր փրկելու և երկարամյա անձնուրաց աշխատանքի համար։
Առաջին անգամ է, որ Ազգային հերոսի կոչմանը բժիշկ է արժանանում, տեղեկացնում է Առողջապահության նախարարությունը։
Բժիշկը պարգևատրվել է Հայրենիք շքանշանով ՀՀ-ին մատուցած բացառիկ ծառայությունների, սրտի բարդ վիրահատություններ իրականացնող նորարարական բժշկական կենտրոն ստեղծելու և մեծաթիվ նոր մասնագետներ պատրաստելու, բազմաթիվ մարդկային կյանքեր փրկելու և երկարամյա անձնուրաց աշխատանքի համար:
Հայրենիքի շքանշանը հանձնվում է երկրի պաշտպանության, իրավակարգի ամրապնդման բնագավառներում, ինչպես նաև ազգային նշանակալի արժեքների ստեղծման գործում Հայաստանին մատուցած համազգային նշանակություն ունեցող բացառիկ ծառայությունների համար: Հայրենիքի շքանշանով պարգևատրված անձը համարվում է Հայաստանի ազգային հերոս: