ԱՄՆ պետքարտուղար Մայք Պոմպեոն Twitter-ի իր միկրոբլոգում գրել է, որ Կիպրոսն ԱՄՆ առանցքային գործընկերն է Արևելյան Միջերկրականում։
ԱՄՆ Պետքարտուղարությունը հայտարարել է, որ Վաշինգտոնը հանում է Կիպրոսին զենքի որոշ բաղադրիչների մատակարարման էմբարգոն, գրում է Interfax-ը։
«Ես ուրախ եմ հայտարարել, որ մենք խորացնում ենք Կիպրոսի հետ գործակցությունն անվտանգության ոլորտում։ Առաջիկա ֆինանսական տարում մենք կհանենք Կիպրոսի ոչ մահաբեր սպառազինության վաճառքի սահմանափակումը»,-ասվում է Պոմպեոյի գրառման մեջ։
ԱՄՆ-ում նոր ֆինանսական տարին սկսվում է հոկտեմբերի 1-ին։
Թուրքիայի ԱԳՆ-ն, մեկնաբանելով Վաշինգտոնի այդ որոշումը, հայտարարել է, որ այն անհամատեղելի է Թուրքիայի և ԱՄՆ դաշնակցային հարաբերությունների ոգու հետ։
Պոմպեոյի հայտարարությունը հնչել է Արևելյան Միջերկրականի ավազանում իրավիճակի վատթարացման ֆոնին։ Վերջին շրջանում Արևելյան Միջերկրականում Թուրքիայի ծավալած էներգակիրների որոնողական աշխատանքների պատճառով լարված հույն-թուրքական հարաբերություններն առավել լարվել են հունական տարածքային ջրերի մոտ թուրքական Oruç Reis նավի կողմից սեյսմիկ հետազոտություններ իրականացնելու պատճառով։
Անկարան նաև հատուկ հետազոտական նավեր է ուղարկել նավթագազային հետախուզման համար այն տարածքներ, որտեղ Կիպրոսը արդյունահանման թույլտվություններ է տվել ԱՄՆ, Ֆրանսիայի և Իտալիայի ընկերություններին։