Գյումրու Շիրազի 53 հասցեում գտվող «Հայ Ասպետ» հյուրատան շենքի տանիքին առանց թույլտվության հավելյալ հարկի կառուցման փորձ է եղել, ինչը Գյումրու համայնքապետարանի կողմից կասեցվել է։
Facebook-ում շինարարության վերաբերյալ ահազանգել է օգտատեր Վահան Գևորգյանը։ Հրապարակումից հետո համայնքապետարանն արձագանքել է՝ նշելով, որ հյուրատունը պատկանում է քաղաքացի Մարինա Բազաևային, համայնքապետարանի համապատասխան բաժինները զբաղվում են այս խնդրով։
PanARMENIAN.Net-ին համայնքապետարանի խոսնակն ասաց, որ աշխատակիցներն ապօրինի շինարարությունը նկատել են օգտատիրոջ գրառումից ավելի շուտ՝ սեպտեմբերի 4-ի երկրորդ կեսին, այցելել են նաև հաջորդող օրերին, սեփականատիրոջը դեռ չի հաջողվել գտնել։
Սեպտեմբերի 6-ի առավոտյան դռան վրա փակցվել է Մարինա Բազաևային սեպտեմբերի 7-ին համայնքապետարան հրավիրող գրություն։